(ភ្នំពេញ)៖ មនុស្សចំនួន ១៧៨នាក់ ត្រូវបានរកឃើញថាមានវិជ្ជមានវីរុសកូវីដ-១៩ ឯអ្នកជំងឺដែលកំពុងសម្រាក ចំនួន ៣៨នាក់ទៀតបានជាសះស្បើយនិងអនុញ្ញាតឲ្យចេញពីមន្ទីរពេទ្យនៅថ្ងៃនេះ បន្ទាប់ពីបានធ្វើតេស្តឃើញ អវិជ្ជមាន ចំនួន២លើក ប៉ុន្តែត្រូវបន្តធ្វើចត្តាឡីស័ក១៤ថ្ងៃ ដើម្បីតាមដានសុខភាព។ នេះបើតាមសេចក្តីប្រកាសព័ត៌មានក្រសួងសុខាភិបាល នៅព្រឹកថ្ងៃទី១៤ ខែមេសា ឆ្នាំ២០២១

មនុស្សនៅក្នុងរាជធានីភ្នំពេញចំនួន ១៤៩នាក់ត្រូវបានរកឃើញថាមានវិជ្ជមានវីរុសកូវីដ១៩ ស្របពេលដែលមនុស្សរស់នៅក្នុងខេត្តកណ្ដាល ១៤នាក់ ខេត្តព្រះសីហនុ ៦នាក់ ខេត្តស្វាយរៀង ៣នាក់ ខេត្តកំពង់ស្ពឺ ២ ខេត្តតាកែវ ១នាក់ ខេត្តត្បូងឃ្មុំ ១នាក់ និងខេត្តសៀមរាប ១នាក់ក៏ត្រូវបានរកឃើញថាមានវីរុសកូវីដ-១៩។

សេចក្តីប្រកាសព័ត៌មាន របស់ក្រសួងសុខាភិបាលក៏បានបញ្ជាក់ផងដែលថា ក្នុងចំណោមមនុស្សចំនួន ១៧៨នាក់ ក៏មានមនុស្សចំនួន ១នាក់ ជាពលកធ្វើដំណើរមកពីប្រទេសថៃ ក៏បានរកឃើញថាមានវិជ្ជមានវីរុសកូវីដ១៩។

គិតត្រឹមម៉ោង៧ព្រឹក ថ្ងៃទី១៤ ខែមេសា ឆ្នាំ២០២១នេះ កម្ពុជាបានរកឃើញអ្នកឆ្លងសរុបចំនួន ៤ ៨៧៤នាក់ ក្នុងនោះករណីសហគមន៍២០កុម្ភៈ ចំនួន ៤ ៣៣៧, អ្នកជាសះស្បើយចំនួន ២ ២៩០នាក់, អ្នកកំពុងសម្រាកព្យាបាលចំនួន ២ ៥៤៤នាក់, អ្នកស្លាប់ចំនួន ៣៥នាក់ និងស្លាប់ដោយជំងឺផ្សេងពេលកំពុងព្យាបាលកូវីដ១៩ចំនួន ៥នាក់៕